આપણું રસોડુ

ગુલેર કોફતા કરી

સામગ્રી : ૧૦૦ ગ્રામ પનીર ૫૦ ગ્રામ જલદારું ૫૦ ગ્રામ તાજો માવો ૨-૩ નંગ લીલુ મરચું ઝીણી સમારેલી કોથમીર ૨૫૦ ગ્રામ ટામેટા ૫૦ ગ્રામ કાજુ ૨૫૦ ગ્રામ ડુંગળી આદુ-મરચાં-લસણની પેસ્ટ ગરમ મસાલો સ્વાદ પ્રમાણે મીઠું

રીત:
સૌ પ્રથમ પનીર અને માવાને બરાબર મસળી લો. હવે જલદારના નાના-નાના પીસ કરી લો. હવે સમારેલા લીલા મરચાં, મસળેલુ પનીર-માવો, કોથમીર, થોડાક કાજુના ટુકડા અને સ્વાદ પ્રમાણે મીઠું આ બધી જ સામગ્રી એક બાઉલમાં લઇ બરબિર મિક્સ કરીને તેના કોફતા બનાવી લો. ત્યાર બાદ તેલ ગરમ કરી તેમાં હળવા ગુલાબી રંગના તળી લો. હવે પેનમાં તેલ ગરમ કરી તેમાં આદુલસણ-મરચાંની પેસ્ટ સાંતળી ઝીણી સમારેલી ડુંગળી ગુલાબી રંગની થાય ત્યાં સુધી સાંતળો. ત્યાર બાદ તેમાં ક્રશ કરેલા ટામેટા ઉમેરી, ઝીણા સમારેલા લીલા મરચાં, સ્વાદ પ્રમાણે મીઠું ઉમેરી બરાબર મિક્સ કરી ચડવા દો. તેલ છૂટું પડે ત્યારે તેમાં જરૂર પ્રમાણે ગ્રેવી કરવા જેટલું પાણી ઉમેરી ખદખદે ત્યાં સુધી સાંતળો. હવે તેમાં તૈયાર કોફતા ઉમેરી બાઉલમાં લઇ કાજુ અને કોથમીરથી ગાર્નિશ કરીને સર્વ કરો. ગરમાગરમ નાન કે પરોઠા સાથે લિજ્જત માણો.

સેવની કટલેસ

સામગ્રી: ૨ નંગ બાફેલા બટાકા ૧ નંગ શિમલા મિર્ચ ૧ નંગ ગાજર ઝીણી સમારેલી લીલી ડુંગળી ૧ નાનો ટુકડો ફુલાવર અડધો કપ બાફેલા વટાણા ઘઉંની સેવ અડધો કપ બ્રેડક્રમ્સ ટોમેટો સોસ ચીલી સોસ ચપટી આજીનો મોટો સ્વાદ પ્રમાણે મીઠું સફેદ મરચું કોર્નફ્લોર

રીત:
સૌ પ્રથમ કો ફલો પાણીમાં પલાળી તેમાં ઘઉંની સેવનો ભૂકો કરીને ઉમેરો. ત્યાર બાદ મોટા બાઉલમાં બાફેલા બટાકાને મસળીને ઉમેરો, ઝીણા સમારેલા શિમલા મિર્ચ, ઝીણી સમારેલી ગાજર, લીલી ડુંગળી, ઝીણું સમારેલુ ફુલાવર, બાફેલા વટાણા, બ્રેડક્રમ્સ, ટોમેટો સોસ, ચિલી સોસ, આજીનો મોટો, મીઠું અને સફેદ મરચું ઉમેરીને મનપસંદ આકારમાં કટલેસ બનાવી લો. હવે પેનમાં તેલ ગરમ કરી તેમાં આ કટલેસને ડીપ ફ્રાય કરી લો. હળવા ગુલાબી રંગની તળાયા બાદ તેને કોર્નફ્લોરવાળી ઘઉંની સેવમાં રગદોડીને લીલી ચટણી કે સોસ સાથે સર્વ કરો.

રાજગરાની સેવપુરી

સામગ્રી : ૧૦૦ ગ્રામ રાજગરાનો લોટ ૨૫૦ ગ્રામ બટાકા આંબોળીયા ખજૂરની ચટણી સ્વાદ પ્રમાણે મીઠું મરી પાવડર લાલ મરચું સંચળનો પાવડર ઝીણી સમારેલી કોથમીર અડધી વાટકી મોળું દહીં
રીત: – સૌ પ્રથમ બટાકાને બાફીને છોલી લો. હવે એક બટાકુ છીણીને ગરમ કરેલા તેલમાં તળી લો. ત્યાર બાદ તેની પર મીઠું અને મરી પાવડર ભભરાવો. હવે રાજગરાના લોટમાં મીઠું અને જરૂર મુજબ તેલનું મોણ ઉમેરીને પાણીથી પુરી માટેનો લોટ તૈયાર કરી લો. હવે તેની નાની નાની પુરી બનાવી તળી લો. બાકી રહેલા બટાકાને અધકચરા મસળી લો. ત્યાર બાદ તેમાં મીઠું ઉમેરી બરાબર મિક્સ કરી લો. હવે પ્લેટમાં પુરી ગોઠવી તેની પર બટાકાનો માવો મૂકી ઉપરથી દહીં પાથરી આંબોળીયા ખજૂરની ચટણી પાથરો. ત્યાર બાદ તેની પર તળેલુ બટાકાનું છીણ પાથરો. હવે ઉપરથી સંચળ, લાલ મરચું અને મરીનો પાવડર ભભરાવીને કોથમીરથી ગાર્નિશ કરી સર્વ કરો.

ફરાળી દહીંવડાં
સામગ્રી:
૨૫૦ ગ્રામ બટાકા ૨ ચમચી રાજગરાનો લોટ ૨ ચમચી શિંગોડાનો લોટ ૧ ચમચી મોરૈયાનો લોટ ૧ ચમચી આરાલોટ આદુ-મરચાંની પેસ્ટ લાલ મરચું,
સ્વાદ પ્રમાણે મીઠું શેકેલા જીરાનો પાવડર ૧ ચમચી અધકચરા વાટેલા શિંગદાણા ૧ ચમચી બૂરુ ખાંડ
રીતઃ

સૌ પ્રથમ બટાકાને બાફીને તેને છોલીને માવો તૈયાર કરી લો. હવે તેમાં રાજગરાનો લોટ, શિંગોડનો લોટ, મોરૈયાનો લોટ, આરાલોટ, શિંગદાણાનો ભૂકો, આદું-મરચાંની પેસ્ટ, મીઠું અને લાલ મરચું ઉમેરીને બરાબર મિક્સ કરી કણક જેવુ તૈયાર કરી લો. હવે તેના નાના નાના લુવા બનાવીને ગરમ કરેલા તેલમાં તળી લો. ત્યાર બાદ દહીંને વલોવીને તેમાં સ્વાદ પ્રમાણે સહેજ મીઠું અને બુરું ખાંડ ઉમેરીને બરાબર મિક્સ કરી લો. હવે સર્વ કરતી વખતે પ્લેટમાં તૈયાર વડાં મુકી ઉપરથી દહીં પાથરી લાલ મરચું, અને જીરાનો પાવડર ભભરાવીને સર્વ કરો.